Pe na sénga e fenésta
te veco passà’ ‘e pressa ogne matina,
e mentre ca stu core s’assesta a ‘o passo tojo,
‘i cu l’uòcchie te cunto d’ammore.

N’ammore puro comme ‘n’ acqua ‘e surgente
ca jésce ‘ntrasatta ‘a int’ ‘e petre dure
e po’ va ‘mpazzanno verso a ‘na deriva
ca nun ‘o sape addo maje va a fernì’.

‘I nun canòsco ‘o viso ca Tu tene,
dell’uòcchie toje manco so’ ‘o culòre,
ne maje a vòce toja aggio sentito
e a vocca toja maje me dunaje nu surriso,
ca, pe furtuna, nun te voti maje p’‘o vierzo mio.
Tu nun saje niente ‘e me e ‘e chist’ammore muto,
c’ogne matina, ‘annascuosto, se nutre ‘e Te.

N’ammore ch’ è ascìuto ‘ntrasatta da ‘stu core,
ca crerevo fusse addeventato ‘e petra dura,
dopo ca se spegnette ‘o foco ‘e chill’ammore
ca me faciva perdere rint’a chill’uòcchie nire
e me faceva frémmere ‘e na passione
ca me pareva nun fernesse maje!

E a Te, quanno ca pass’ ‘e pressa, ogne matina,
pe chesta senga ‘e fenésta,
spiànnote comme, int’ a nu suonno ‘ncantàto,
te jetto addosso tutto l’àmmore ca m’è remasto ‘nsino,
e nun ‘o pozzo cchiù dunà a nisciuno, e te rico accussì:

“Nun te vota maje arretro, amore sconosciuto,
pecché maje!, t’hia addunà’ ‘e me:
va, ritto ritto, pe chella strata toja,
ca nun ‘o può tradì’ “ ‘n’Ammore ‘e fantasìa”

Non sono presenti notizie riguardanti questa opera.