Pe nu mumento sulo tutt’e tre,…
ve vulisse riavè’ criature tennere e rusate,
stritte, stritte a mme, comme ve tenivo allora!
Me vulisse perdere ancora
int’a chill’uòcchie chine ‘e suonno o chine ‘e làcreme lucenti,
ca sempe m’ ‘e purtàvo addosso,
comme vuléssero scuprì’, int’a me, ‘o mistero d’‘o munno!

Pe nu mumento sulo…, ve vulisse sentère ‘o battito d’ ‘o core
apprìesso, apprìesso ‘a ‘o mio
e ‘o gorgoglìo d’ ‘o latte che currea rint’ ‘e vucchélle assetate,
e ‘a vita mia ca, gocciola, pe’ gocciola s’ammeschìava a ‘a vuosta
e ve vedivo crescere sonno pe’ sonno!
Ve vurria ‘nventà’ nu cant’ ‘e fantasìa,
ca ve putesse addurmì’, pe’ n’ata vota, int’ ‘a vòce mia!

Pe nu mumento sulo…, ve vurrìa fa tastìa’ ‘sta faccia,
cu ‘e manelle ‘mpazzute ‘e frennesìa,
e ‘ntanto séntere ‘ntuppà’, su chesta,
‘e vucchélle morbide e pògnente smanìuse ‘e muzzecà’!

Ve vurria coprì’ ‘e vase…, ‘e vase delicate!,
cuntannove tutt’ ‘o bbene, senza f’ascì’ parole,
sulo cu ‘a tennerezza e chesti vracce,
ca, mo, pare ca nun teneno cchiù niente!

Mo, site cresciute e, ‘ngrazìanno a Ddio, site buòne e belle!
Ma - guaje a mme! - se me venesse ‘nmente,
pe nu mumento sulo…!, “ ‘e rinnovà’ ‘o miràculo
d’avervi piccerille, tutt’ ‘e tre!”.
pe’ pazzìà’ cu vuje “a’ ‘a mamma e ‘e figliùlelle!”.

Non sono presenti notizie riguardanti questa opera.