Addò’ vanno a fernì’ i suspiri
ca saglìeno dall’ àneme d’ ‘o Munno?
Saglìeno ‘ncielo e ‘e nnuvole pietose
l’annasconnèno int’ a chell’uvatta ‘ncantata,
e chilli ‘e spingono, co tutt’ ‘a putènza d’‘o sciato
ca se so’ tìrato da l’àneme tribbulate:
‘i manneno su, su, ritti ritti ‘mparaviso.
‘O Pate nuosto, ca tenìmmo ‘ncielo,
se l’accatta tutte, uno ‘a ‘a vota…,
e ‘i custodisce int’’a Mènte Soja,
ch’è granne assaje!
D’ogne suspìro sape ‘a sofferenza
ca l’ha fatto ascì’ da fonno all’ànema
‘e chillo figlio sojo.
E, quanno, a Lui pìacenno,
se chiamma a Sé ‘sti figli tribbulate
p’ogne suspiro ca chisti hanno tirato,
pe’ tutt’ e patemiénte c’ ‘hanno sopportato
ce fa saglì nu scalino:
e sagli e sagli…, sell’accosta tutt’attuòrno
a’ ‘o Trono Sojo, nmiezzo all’Eterna Gloria,
dell’angiule, de’ sante e d’‘a Maronna,
ca, cu nu sorriso ‘e Mamma, ‘e cunsòla
e tutt’ ‘e strazzie c’hanno vivuto ‘nterra!
Ca tutt’ ‘o sapeno: i tribbulate
ca passeno ‘a vita suspìranno,
so’ prediletti ‘e Ddio e, viàti a lloro!,
quanno c’arriva ‘o juorno d’ ‘o trapasso,
ritti ritti ‘mparaviso vanno!