‘O tengo ‘nnànz ‘a l’uòcchie
chill’altarino ca ‘a casa mia facèvemo
‘a ‘o mese ‘e Maggio:
na Madunnella, doje cannèlelle appicciàte,
nu mazzo ‘e rrose
ncoppa a ‘na tuvàglia tutta ricamata!

E ancora siento ‘o coro d’avummarie
- quante n’avimmo dette! -
nnanz’a Madonna Santa d’ ‘o Rosario:
èremo diece vòce, e tutte quante ne facevémo una;
surtanto ‘a vòce ‘e Mamma era sula
pe’ ce guidà’ ‘a curòna.
So’ passate tant’anne ma ancora
siento l’addòre d’ ‘e cannèlelle appicciàte
e, ancora mo, chelle rose vanno prufumanno!
Ogge, quanno pienzo a chilli “mesi ‘e Maggio”,
me siento santa e faccio “nu sciurétto” (1)
e ‘o doce ancora siento rint’ ‘o pietto!
Comm’era bello, a’ ‘a casa mia,
“ ‘o mese ‘e Maggio!”.


...........................................……….............................
(1) Sciurétto = piccolo sacrificio che si offriva
in onore della Madonna nel mese di Maggio

Non sono presenti notizie riguardanti questa opera.