‘O chiamavano “ ‘o Riluorgio d’ ‘o quartière”:
era nu piscatore.
Cantava ogne matina, ‘e vote alléro alléro,
‘e vote ‘e pecundrìa,
mentr’accunciàva ‘a rezza.

Nu juorno ‘e ggente d’ ‘o quartière
nun sentetteno ‘o canto d’ ‘o “Riluorgio”
e se ne jetteno a’ ‘a riva a scrutà’ l’onne:
l’uòcchie anziùse, ‘e rrecchie appizzàte:
jeveno truvanno…. “’na vòce”.

Sentetteno…, chianu chiano, doce doce,
comm’ a ‘na nénia ‘e malinconia…,
quanno…, cu l’onne, sbàttette ‘ncoppa ‘a riva
‘na varca…, cu na rezza arravuglìata:
saglì ‘n’ allucco !!…, e fu tutto nu murmulìo…!
E…, cu nu sciato sulo, tutte quante…:
“Oi né…! ‘O Piscatore…, jettaje a mare…
…. “’a vòce”…!! “Povero Piscatore…!!”.

E ‘a ggente tuornò adderèto ammaramente,
cu l’uòcchie ‘nfuse ‘e chianto, ‘e labbre nzerrate:
fernette ‘e murmulià,
pe nu cuprì’ ‘o canto tristo d’ ‘o “Riluorgio”!

Ma…., a mente gira e parla:
“Comm’ ‘he cagnato, oi Mare!,
d’ ‘o Piscatore ‘a vòce!
Mo, sape sulo ‘e nostalgia;
nun è cchiù trista o allèra:
comm’a na nènia ‘e malencònia,
se canta all’onne, doce, doce, doce!




I° Premio al Concorso PREMIO NAZIONALE DI POESIA “ROMA OGGI”
Indetto dall’ “A.R.C.A.R” (Associazione Regionale) XIII Edizione, Febbraio 1984