A Napule ce steva nu Vico:
‘o “Vico dell’Ammore!
‘A sera m’ ‘a purtavo
pe’ ce annascònne int’ ‘a ‘n’androne :
‘na reggia addeventava,
e ‘nfino ‘ncoppa a ‘o scalone
facevemo saglì ‘na nuvula d’Ammore!

Vico d’Ammore!
Dint’ ‘o buio ‘na vampa alluminàva
e, cu nuje, muriveno ‘e pparole,
addeventàvano penziere;
muriveno ‘e suspire.
addeventàveno vase!
‘E vracce nuoste…,ereno véstìti!

Vico, Vico d’Ammore!
Ancòra ‘int’ ‘e mane siento ‘a seta d’ ‘e capìlle suoje,
e ‘o viento dell’ammore ca ce currea pe’ ‘e vvene;
e ancora ‘a pella fremme!

S’io, mo turnasse addu te, Vico d’Ammore,
nun tenesse cchiù parole, suspire e vase!
Mo, vuòte avesse chesti vracce e chesti mmane!
E nun sentesse cchiù ‘o viento dell’Ammore!

Dimme, le ‘nzerri Tu, Vico d’Ammore,
tutte ‘sti ccose ca m’hanno acciso o còre?
O se ne vulaje ‘ncielo…, p’’o scalone…?!,
chella nuvula d’Ammore
ca ce ‘ncartava ‘nzìeme, core cu core!