Pittate ‘e ccase, ‘a sott’ ‘o cièlo blù,
comme sciure s’affacceno p’ògne parte,
miezz’ a nu mare verde adduroso ‘e pine
Loggetelle e feneste addo’ prnnòno rose e giranie ‘e malvasia;
sciure arance e limone e gielzummine,
abbarbicate a ‘e mure ca cìngono e ciardine.
Limpida l’aria cummacche:
t’abballàno ‘e culore nnanz’all’uòcchie

Capo ‘e Posillipo vaje contemprànno ‘o mare;
te ‘ncant’attuorno nu silenzio antico
ca frèmere te fa ‘o core comm’ m’aucièllo ‘a ‘o primmo volo!
Po’ siente ‘a luntano ‘o cant’ ‘e l’onne
ca vanno sbattuleanno ‘a sopra ‘a riva,
jucànno a ‘nnascòndino pe’ miezz’ ‘e scuòglie brillante.
N’addòre acuto saglie, ca se va mischiànno
co’ ‘o prufùmmo d’ ‘e sciure, tutte quante!

Mo, vulàno st’addori p’ògne vvia,
‘a mènte te schiara e ‘o pietto te s’’aràpe
e senza fa ‘sci nu sciato te siente ‘e canta ‘o core!

Capo Posillipo,
int’ ‘a ‘na lastra ‘e cristallo
ca tene ‘ncartata a vita,
sape parlà’ sulamente ‘e l’eterna puìsia
ca ‘ncanta ‘o munno tutto…, comme ‘na magìa!





In: Antologia dei Poeti Italiani Contemporanei, Campania - Abruzzo - Molise
I^Edizione, Febbraio 2006 , Aletti Editore